Txiki-txikitatik sentitu izan dut nire burua sormenarekin guztiz harremanatuta. Burua txoriz, ametsez eta gogoetaz beteta eta eskuak eta gorputza ezin gelditu ibili izan naiz beti. Arte Ederretan lizentziatu nintzen. Bilbon, ikasten nengoen bitartean, Antzerkiola Imajinarioko kideekin elkarlanean hasi nintzen. Hau 1999. urtean izan zen, 19 urte nituela. Hura izan zen nire eskola eta nahiz eta geroago beste eskola batzuk ere izan ditudan, hau izan zen lehenengoa eta garrantzitsuenetarikoa. Talde handia ginen eta bertan hainbat lanetan parte hartzeko aukera izan nuen. Besteak beste, 8 Olivetti poetikoak, Mundopolski: erreboltaren ziaboga eta Yuri Sam. Otoitza.

Bidean talde desberdinekin lan egiteko aukera ere izan dut, eta nola ez, ofizioaz ikasten jarraitzekoa. Horien artean, Arriaga antzokiak ekoiztutako eta Calixto Bieitok zuzendutako Obabakoak antzezlanean, Tanttakaren Uda gau bateko ametsa eta Komunikazioa- Inkomunikazioa lanetan, Arte drama, Le Petit Theatre de Pain eta Dejabu taldeekin Errautsak antzezlanean, Hikarekin Ilargiaren bi aldeak haurrentzako antzerkian, Trashumantes konpainiarekin Crónica de la noche abierta bakarrizketan eta Moaré danzarekin Gau Bakar bat izeneko dantza piezan, besteak beste.

Benetan maite dut gauza desberdinak probatzea eta ni neu erronka desberdinen aurrean jartzea. Telebistan ere aritu izan naiz. Bertan, parte hartutako proiektu maiteenak “Martina” eta “Aitaren etxea” izan dira, arrazoi desberdinengatik, oso modu berezian bizi izan ditudanak. Zineman ere “Igelak” filma eta “El guardián Invisible” aipatu nahi ditut. Izugarri ikasi eta gozatu nuen lan horien errodajeetan. Azkenak utzi didan ikasketa pertsonala erraldoia izan da.

Eta azkenik, nahiz eta bukaerarako utzi dudan, sorkuntza pertsonalaren esparrua niretzat ezinbestekoa den esparru bat da. Laborategia da, etxeko sukaldea, jolasteko aukera gehien ematen dizun txokoa eta sortzaile bezala hazteko eremu garrantzitsuena. Modu kolektibo zein pertsonalean hainbat lanen sorkuntzan aritu izan naiz. Egindako lanen artean, esanguratsuenak: Euli-giro, ni neu ere parte naizen Kamikaz Kolektiboarekin sortutakoa, Diálogo besteak beste, Gabriel Ocina aktore eta lagunarekin batera sortutakoa, Heriotza bikoitza (doble malta) Jon Ander Alonso, Eneko Sagardoy, Zazpi t´erdi eta beste hainbat lagunekin sortutakoa edo guztietan pertsonalena dena eta liburu honetan ikusi ahal izango duzuena Stereo, zalantzarik gabe nire lan kuttunetakoa.

Miren Gaztañaga. 1979 Orereta.